RUS
SMARTNEWS.KZ басылымының хабарлауынша, Орал қаласында қоғамдық көлік ішінде орын алған жанжал бұрыш баллонын қолданумен аяқталды. Полиция оқиғаға қатысы бар күдіктілерді анықтап, бір адамды қамауға алды.
Instagram-дағы jagdaikz паблигінде жарияланған видеода «Әдепсіз жұп автобуста жолаушыларға шабуыл жасады» деген тақырыппен тарады.
Әлеуметтік желідегі жазбаға сәйкес, оқиға «My Fest» фестивалінің соңғы күнінде болған. Үш күн бойы шараға БАҚ өкілі ретінде қатысқан жас жігіт үйіне қайтып келе жатқанда, автобус салонында белгісіз ер адам оған бетке бұрыш баллонын шашқан.
Куәгерлердің айтуынша, жұп жолаушыларға агрессивті түрде тиісіп, қолындағы баллонды бұлғап отырған. Нәтижесінде жігіттің көзіне химиялық зат тиіп, ол күйік алып, ауруханаға жеткізілген. Қасындағы қызы да зардап шеккен – оны ұрып жіберген.
Батыс Қазақстан облыстық полиция департаментінің баспасөз қызметі оқиғаға қатысты қылмыстық іс қозғалғанын хабарлады.
«Жағдайға қатысы бар барлық адамдар анықталды. Біреуі ұсталып, уақытша ұстау изоляторына қамалды. Қалған мән-жайлар тергеу барысында анықталады», – деп мәлімдеді полиция.
Қазіргі уақытта тергеу амалдары жүргізілуде. Құзырлы орган кінәлілер заңға сәйкес жауапқа тартылатынын айтты.
Желі қолданушылары бұл оқиғаны қызу талқылап, қоғамдық көліктегі қауіпсіздік мәселесін көтерді. Көпшілігі «бұндай бұзақылықты қатаң жазалау керек» десе, енді бірі «автобуста бейнебақылауды күшейту қажет» деген пікір білдірді.