RUS
SMARTNEWS.KZ басылымының хабарлауынша, АҚШ президенті Дональд Трамп ресейлік әскерлер күштеп алып кеткен украиналық балалардың тағдырына ерекше назар аударылатынын мәлімдеді. Оның айтуынша, Вашингтон мен Еуропа одақ елдері Украинамен және өзге де серіктестермен бірлесе отырып, балаларды отбасына қайтару жолында жұмыс істейді.
Өткен аптада Аляскада Ресей басшысы Владимир Путинмен кездескен Трамп, Кремльге АҚШ-тың бірінші ханымы Мелания Трамптың жеке хатын жеткізген. Ол құжатта балалардың тағдырына алаңдаушылық білдіріліп, «бейкүнә сәбилерді қорғау» қажеттігі айтылған. Сарапшылар мұны дипломатияның «жұмсақ күш» үлгісі деп бағалады.
Ресми дерек бойынша, Украина Ресейдің 19,5 мыңнан астам баланы депортациялағанын дәлелдей алған. Оның ішінде тек 1 350-і ғана халықаралық делдалдардың көмегімен елге қайтарылды. Алайда Йель университетінің зерттеу орталығы бұл көрсеткіш 35 мыңға жуық болуы мүмкін десе, Мәскеу тіпті «700 мыңға жетуі ықтимал» деп мәлімдеді.
Украина СІМ орынбасары Марьяна Беца Euronews-ке берген сұхбатында:
«Президент Трамп пен бірінші ханым Мелания Трамптың бұл мәселені назарда ұстауы біз үшін өте маңызды. Өйткені балаларды қайтару – кез келген ықтимал бейбіт келісімнің ажырамас бөлігі», – деді.
Зеленскийдің айтуынша, Елена Зеленская да АҚШ-тың бірінші ханымына алғыс білдіріп, оған арнайы хат жолдаған. Ақ үйдегі кездесуде Трамп балалардың тағдырына байланысты бейнелерді көрген сайын жұбайының «терең уайымға түсетінін» айтты.
Еурокомиссия басшысы Урсула фон дер Ляйен де бұл мәселеге қосылды.
«Әрбір бала өз отбасына оралуы тиіс. Бұл біздің басты басымдықтарымыздың бірі болуы керек», – деді ол.
Қазіргі таңда Украина кез келген бейбіт келіссөздің шарттарының бірі ретінде балаларды қайтаруды талап етіп отыр. Киев Мәскеуге 339 баланың аты-жөні жазылған алғашқы тізімді тапсырғанымен, Ресей жағы екі айдан бері нақты жауап берген жоқ.
Бұған қоса, Euronews мәліметінше, Луганск облысында Ресей орнатқан әкімшілік украиналық балаларды онлайн «каталогқа» енгізіп, оларды күштеп асырап алуды насихаттаған. Базада 294 баланың есімі көрсетіліп, жасы, жынысы, көз бен шаш түсіне дейін бөліп орналастырылған.
Айта кетейік, 2023 жылы Халықаралық қылмыстық сот Путинге Украинадан балаларды заңсыз әкеткені үшін қамауға алу жөнінде ордер шығарған. Құжатқа сәйкес, Ресей президенті МУС-ке мүше кез келген 124 елдің аумағына аяқ басса, тұтқындалуы мүмкін.