RUS
SMARTNEWS.KZ басылымының хабарлауынша, Израиль билігі Қатар мен Мысыр дайындаған уақытша бітім жөніндегі ұсынысты талқылап жатыр. Жергілікті БАҚ мәліметінше, шешім алдағы екі күнде қабылдануы мүмкін. Израиль келісімнің басты шарты ретінде ХАМАС-тың қолында қалған 50 тұтқынды босатуды талап етуде.
Қатар тарапы ХАМАС құжатқа «оң реакция білдіргенін» хабарлады. Елдің Сыртқы істер министрлігінің өкілі Мәжит әл-Ансари егжей-тегжейін ашпағанымен, ұсыныс АҚШ арнайы өкілі Стив Виткофф дайындаған жоспарға «дерлік ұқсас» екенін айтты. Ол құжат 60 күндік атысты тоқтату, ХАМАС кепіліндегі адамдардың бір бөлігін босату және жүздеген палестиналық тұтқынды айырбастау, сондай-ақ гуманитарлық көмекті жеткізуге рұқсат беруді қамтиды.
Израильдің қорғаныс министрі Исраэль Кацтың сөзінше, ХАМАС келіссөзге тек Израильдің Газа қаласын бақылауға алу жоспарының қорқынышы әсер еткен.
Бұл уақытта БҰҰ өкілдері жағдайдың ушығып бара жатқанын ескертті. Ұйымның пікірінше, Газаға жеткізіліп жатқан көмектің көлемі жаппай ашаршылықтың алдын алуға жеткіліксіз.
«Газа тұрғындары аштық қаупімен бетпе-бет келіп отыр. Бұл – Израиль үкіметінің гуманитарлық жеткізілімдерді шектеу саясатының салдары», – деді БҰҰ Адам құқықтары басқармасының баспасөз хатшысы Тамин аль-Хитан.