RUS
SMARTNEWS.KZ басылымының хабарлауынша, Ақтөбеде жапон асханасының тағамын жеп, сегіз адам ауруханаға түсті. Олардың екеуі ауыр халде жансақтау бөлімінде жатыр.
KTK арнасының дерегінше, уланғандардың барлығы сушиді бір жерден тапсырыс арқылы алған. Алдымен науқастардың қызуы көтеріліп, жүрегі айнып, құсу белгілері байқалған. Ақырында жедел жәрдем шақыруға мәжбүр болған. Уланғандардың арасында екі бала бар.
Дәрігерлер науқастардың жағдайы біртіндеп тұрақталып жатқанын айтады. Ал санитарлық қызмет өкілдері тапсырыс қабылдаған қоғамдық тамақтану орнын тексеріп жатыр. Ол уақытша жабылды.
«Қазір екі бала, төрт ересек ем қабылдап жатыр. Оның ішінде екі ересек жансақтау бөліміне түсті. Қазіргі жағдайы қанағаттанарлық, емделіп жатыр. Барлығы да жапон асханасынан суши тапсырыспен алған», – деді Ақтөбе облыстық жұқпалы аурулар ауруханасы бас дәрігерінің орынбасары Жансәуле Дәулетова.
Мамандардың айтуынша, ыстық күндері тез бұзылатын тағамдарға, әсіресе сушиге сақ болған жөн.