RUS
SMARTNEWS.KZ басылымының хабарлауынша, Ұлттық компания «ҚазМұнайГаз» 2025 жылдың алғашқы жартыжылдығындағы негізгі қаржылық көрсеткіштерін жариялады. Мұнай өндіру мен өңдеу көлемі артқанына қарамастан, компанияның таза табысы азайған.
Кіріс өсті, бірақ таза табыс төмендеді
Есепке сәйкес, қаңтар-маусым айларында ҚМГ кірісі 4,5 млрд долларды құрап, өткен жылдың сәйкес кезеңімен салыстырғанда 6,2 %-ға өсті. Мұнай өнімдерін KMG International арқылы сату негізгі табыс көзі болды. Сондай-ақ «Теңізшевройлдағы» үлестің артуы да кірістің өсуіне әсер еткен.
Алайда таза табыс 2,8 %-ға азайып, 534 млрд теңгеге тең болды.
«Таза табыстың төмендеуіне мұнайдың әлемдік бағасының құлдырауы, амортизация шығындарының өсуі, өзге қаржылық кірістердің азаюы, еншілес ұйымды шығару кезіндегі табыстың төмендеуі және теріс валюта айырмасы себеп болды», – делінген есепте.
Өндіріс көлемі артты
Жартыжылдық қорытындысы бойынша ҚМГ мұнай мен конденсат өндіруді 8,8 %-ға, газ өндіруді 18,3 %-ға, ал Қазақстан мен Румыниядағы зауыттарда мұнай өңдеуді 16,5 %-ға ұлғайтқан. Тек мұнай тасымалдау көлемі 0,3 %-ға азайған.
Сонымен қатар өндірістік шығындар 18,7 %-ға өсіп, 759 млрд теңгеге жетті. Бұл өсім еңбекақы мен электр энергиясына жұмсалатын шығындардың, сондай-ақ KMG International объектілерін жөндеу және қызмет көрсету құнының көтерілуімен байланысты. Алты айда компания 282 млрд теңге салық төлеген.
Дивидендтер артты
Ұлттық компания дивиденд көлемінің айтарлықтай артқанын да хабарлады.
«2025 жылдың алғашқы жартысында бірлескен кәсіпорындар мен еншілес ұйымдардан түскен дивидендтер 53,2 %-ға өсіп, 474 млрд теңгені құрады», – деп мәлімдеді ҚМГ.
Айта кетейік, өткен жылдың сәйкес кезеңімен салыстырғанда Brent маркалы мұнай бағасы 14,5 %-ға төмендеген, ал теңгенің орташа бағамы доллармен 14 %-ға әлсіреген.