RUS
SMARTNEWS.KZ басылымының хабарлауынша, Ресейдің Санкт-Петербург қаласындағы Батыс округтік әскери соты 28 жастағы Қазақстан азаматы Артур Мартыновты 16 жыл қатаң режимдегі колонияға қамау туралы үкім шығарды, деп хабарлайды «Медиазона».
Мартыновқа бірнеше бап бойынша айып тағылған: тыңшылық, диверсия жасау, диверсия мен теракт ұйымдастыруға дайындық, терроризмге көмектесу және теракт жасауға әрекеттену.
Айыптау нұсқасы бойынша, ол украин арнайы қызметінің тапсырмасын орындап, ақша үшін Санкт-Петербургтегі мұнай өңдеу зауытының координаттарын жеткізіп отырған және инфрақұрылым нысандарын өртеген.
Тергеу мәліметінше, 2023 жылы Мартынов Санкт-Петербург пен Ленинград облысында байланыс мұнараларын өртеген, тарату қалқанын, электр кабелін зақымдаған және трансформаторлық қосалқы стансаға шабуыл жасауға әрекеттенген. Айыптау негізі ретінде мессенджердегі хаттар мен онлайн «дайындықтан» өткені туралы деректер келтірілген.
Сотталған азамат өз кінәсін мойындамайды. Қазақстанның ресми билігі әзірге бұл жағдайға қатысты пікір білдірген жоқ.