RUS
«Пациент жазылып үйіне шықты, өзін жақсы сезінеді. Оның толық қалпына келуіне біраз уақыт керек», - дейді №3 қалалық көпбейінді аурухананың емдеуші дәрігері, хирург Арман Сарқытбай.
Өз кезегінде пациент Мұслухаддин Надыров аурухана басшылығы мен дәрігерлерге ризашылығын жеткізді.
«Мені ауруханаға 14 жерден пышақ жарақатымен, ес-түссіз алып келді. Дәрігерлер жанымды аман алып қалды. Хирургия бөлімінің жетекшісі Сергей Вервейн мен емдеуші дәрігер Арман Сарқытбайға алғысым шексіз», - дейді жазылып шыққан мешіт қызметкері.
Еске сала кетейік, 15 наурызда Астанадағы мешіттердің бірінде шаруашылық қызметкерін біреу пышақтап кетті.
Бұл туралы Қазақстан мұсылмандары діни басқармасының баспасөз хатшысы Ағабек Қонарбайұлы мәлім еткен еді.
Кейін болған оқиғаға қалалық полиция департаменті және қоғамдық денсаулық сақтау басқармасының баспасөз қызметі түсінік берді.
«14 наурызда жедел жәрдем бригадасы науқасты №3 көпбейінді қалалық ауруханаға жеткізді. Пациент бірнеше жерден пышақ жарақатын алған, жағдайы ауыр. Науқасқа шұғыл ем жүргізілді. Қазір науқастың жағдайы өте ауыр. Пациентті аман алып қалу мақсатында реанимация және интенсивті терапия бөлімінде ем жалғасып жатыр», - деген хабар алған едік елорданың денсаулық сақтау басқармасынан.