RUS
SMARTNEWS.KZ басылымының хабарлауынша, Атырауда автосалон атын жамылған алаяқтық ісі әшкере болды. «Абырой Авто» компаниясына көліктерін сеніп тапсырған жүзден аса адам ақшасыз, ал көліктері басқа адамдардың қолында қалғанын айтып дабыл қағуда.
Компания клиенттерге көлікті «сатуға қабылдап», ақшаны 10 күн ішінде толық төлеуге уәде берген. Алайда уәде орындалмаған: көліктер автосалон атына рәсімделіп, жылдам сатылып кеткен. Иелері не ақшасын, не көлігін қайтара алмай отыр.
«Айтқанына сеніп едім. 10 күнде ақша аласыз деді. Екі ай өтті – көлік басқа қалада, ал маған әлі де “күтіңіз” дейді», – дейді зардап шеккендердің бірі.
Алдын ала мәлімет бойынша, 120-дан астам адам алданған. Көпшілігі несиемен алған жалғыз көлігінен айырылған.
Полиция «Абырой Авто» иелерін қамауға алғанын және «Алаяқтық» бабымен қылмыстық іс қозғалғанын растады. Тергеу барысында келтірілген шығын көлемі мен басқа да күдіктілер анықталып жатыр.
Бұл істің салдары басқа өңірлерге де жетті. Астанада осы компаниядан сатып алынған Toyota Prado тәркіленген. Жаңа қожайындар ресми құжаттарын көрсеткенімен, көлік айғақ ретінде алыныпты.
«Патруль үйге келіп, еш түсіндірместен көлікті алып кетті. Ешбір құжат көрсеткен жоқ», – дейді куәгер.
Полиция бұл әрекетті Атыраудағы тергеушінің нұсқауымен жасағандарын мәлімдеді.
Зардап шеккендер кінәлілердің әділ жазалануын және шығынды қайтаруды талап етуде.
«Бұл салон ашық жұмыс істеді, кеңсесі бар, бәрі заңды сияқты көрінді. Ешкім осындай қулыққа барады деп ойламады», – дейді тұрғындар.