RUS
SMARTNEWS.KZ басылымының хабарлауынша, қазақстандықтар танымал блогерлер Ерболат Жанабылов пен Эльмира Толегенова ұйымдастырған байқау жайлы қызу пікір білдіріп жатыр. Олардың жариялаған шарттары әлеуметтік желіде дау тудырды.
Апта бұрын блогерлер Instagram парақшасында «10 автокөлік сыйлаймыз, 10 отбасыны қуантып, армандарды орындаймыз!» деп жариялаған еді. Постта «репост жасағандар арасынан бір адам Subaru жеңіп алады» деген сөздер де болды. Көпшілік ұтысқа қатысу үшін репост жеткілікті деп ойлаған.
Алайда кейінірек Ерболат Жанабылов арнайы сілтеме жариялап, онда автокөліктерді ойнату тек оқыту курсын сатып алғандар арасында өтетіні айтылған. Курстың құны – 30 мың теңге. Тақырыбы – Қытаймен сауда жасауды үйрету.
Бұл жағдай желі қолданушыларының наразылығын күшейтті. Көптеген пікірлерде:
«Адамдар әлі де мұндайға сенеді екен», «Қанша рет қатыстым, бірде-бір рет ұтпадым. Тіпті эфирдің видеосын да сақтамайды», «Бұларды қашан жауапқа тартады екен?», «Алаяқтық қой. Халықты алдаудың жаңа тәсілі» деген жазбалар қалдырылды.
Бір қолданушы:
«Өздеріңіз бизнесмен емессіздер, қалайша бизнеске үйретесіздер?» деп сұрақ қойған.
Дегенмен, жағымды пікірлер де бар. Кейбір жазылушылар жүрекшелер қойып, ұтысты асыға күтіп отырғанын жазған.
Осы оқиғаға байланысты Мәдениет және спорт министрлігі түсініктеме берді. Ведомствоның мәліметінше, Ерболат Жанабыловқа түсініктеме беру туралы хабарлама жіберілген. Егер жауап болмаса, әкімшілік іс қозғалады.
Қолданыстағы заң бойынша, лотереяны тек лицензиясы бар оператор ғана өткізе алады. Бұны бұзу – жеке тұлғаларға 100 АЕК (шамамен 393 мың теңге) көлемінде айыппұл салуға негіз.
Айта кетейік, бұған дейін Ерболат Жанабылов бірнеше рет әкімшілік жауапкершілікке тартылған. Өткен жылы ол қалада көліктің орнына бассейн орнатып жүргені үшін айыппұл төлеген. Бұған қоса, карантин кезіндегі коменданттық сағатты бұзғаны белгілі.
Биыл көктемде блогер жұбайына ерекше ұсыныс жасап, он жылдық некесін гүл шоуларымен атап өткен сәт те елдің назарында болған еді.