RUS
SMARTNEWS.KZ басылымының хабарлауынша, Тараз қаласының тұрғыны сауда үйінің жабдығынан шыққан қатты шудың кесірінен демалысы бұзылғанын айтып, сотқа жүгінген.
Соттың ресми Telegram-арнасында жарияланған мәліметке сәйкес, әйел ЖШС-не қарсы талап арыз түсірген. Ол сауда үйіне тиесілі жабдықты оқшаулап, шуды азайтуды сұраған.
«Талапкердің айтуынша, тұрғын үйге жақын орналасқан сауда үйінің қондырғылары қарт кісілердің ұйқысын бұзып, қалыпты демалу құқығын шектеп отыр», – делінген хабарламада.
Тұрғындар бірнеше рет тиісті органдарға шағымданған. Тексеру барысында дыбыс деңгейінің нормадан асқаны анықталғанымен, жауапты тарап ешқандай шара қолданбаған.
Сараптама қорытындысы бойынша, пәтерлердегі шудың деңгейі 49,5 дБ болған. Бұл рұқсат етілген 40 дБ көрсеткішінен жоғары.
Сот отырысында тараптар бітімге келді. Келісім бойынша, ЖШС сараптама шығындарын (84 мың теңге) өтеп, шудың көзін оқшаулауға міндеттелді. Ал талапкер компанияға қатысты өзге шағымдарынан бас тартты.
Сот келісімді бекітті, іс тоқтатылды. Мемлекеттік баж сомасы талапкерге қайтарылды. Шешім заңды күшіне енді.
Айта кетейік, бұған дейін Алматыда көпқабатты үй тұрғындары шатырдың хостелге айналуына наразы болған еді. Ал элиталық аудандарда тұратын азаматтар түнгі клубтар мен караоке орындарынан шыққан шудан зардап шегіп отырғанын айтқан.