RUS
SMARTNEWS.KZ басылымының хабарлауынша, Қостанайдағы Назарбаев Зияткерлік мектебінің оқушысы Лидия Осенникова «Білім мұзжарғышы» халықаралық арктикалық экспедициясынан оралды. Бұл туралы Kazinform жазды.
Арктикаға саяхат «Росатом» мемлекеттік корпорациясының қолдауымен ұйымдастырылды.
Биылғы жылы экспедиция әлемнің 21 елінен 66 оқушының басын қосты. Қатысушылар Мурманскіден «Жеңіске 50 жыл» атомдық мұзжарғыш кемемен жолға шығып, Солтүстік полюске жетіп, Франц-Иосиф жері архипелагына барды.
НЗМ баспасөз қызметі түсіндіргендей, он күн бойы балалар Арктика жағдайында ғылыми тәжірибелер жүргізді, атом энергетикасы, экология және ғарыш саласындағы мамандардың дәрістерін тыңдады, Арктиканың климаты мен биоалуантүрлілігін зерттеді.
Олар сондай-ақ ядролық мұзжарғыштың дизайны мен жұмыс істеу принциптерімен танысып, жаһандық экологиялық проблемаларды талқылауға қатысып, мәдени алмасумен айналысты.
Лидия Осенникованың айтуынша, экспедиция ол үшін нағыз жаңалық болды.
– Солтүстік полюске бару және Арктиканы өз көзіммен көру – керемет әсер. Осы бірегей экспедицияға қатысу мүмкіндігіне ризамын. Бұл тәжірибе мені ғылымға деген қызығушылығымды арттырып, әрі қарай дамуға шабыттандырды, – деді бойжеткен.
«Білім мұзжарғышы» экспедициясы алтыншы рет өткізіліп отыр. Оның мақсаты – жаратылыстану ғылымдарын насихаттау, дарынды мектеп оқушыларын қолдау және оларға кәсіптік бағдар беруге көмектесу. Жоба жүзеге асырылған жылдар ішінде оған әлемнің түкпір-түкпірінен 400-ден астам мектеп оқушысы қатысты.