RUS
SMARTNEWS.KZ басылымының хабарлауынша, Шымкентте такси салонын бүлдірген әйелге қатысты қылмыстық іс тоқтатылды.
Инцидент 2025 жылдың маусым айының басында болған. «Яндекс Такси» логотипі бар көліктің салонында әйел мен жүргізуші арасында жанжал шығып, ол агрессияға ұласқан.
Сот дерегінше, жолаушы алдымен сыра бөтелкесімен көліктің алдыңғы панелін және мониторын сындырған. Кейін көліктен шығып, сол бөтелкемен сол жақтағы алдыңғы әйнекті қиратыпты. Бұдан соң жол шетіндегі тасты алып, алдыңғы және артқы терезелерді сындырған, сондай-ақ есіктің ішкі қаптамасын бүлдірген.
Автокөлік иесі соттан әйелді қылмыстық жауапкершіліктен босатуды сұраған, себебі келтірілген залал толық өтелген. Айыпталушы өз кінәсін мойындап, барлық шығынды жапты.
Сот тараптардың татуласқанын ескеріп, әйелді қылмыстық жауапкершіліктен босатты және істі тоқтатты.