RUS
Талқылаудың негізгі тақырыбы – Smart City жобасын іске асыру. Жоба аясында қоғамдық қауіпсіздік, инфрақұрылымды цифрландыру, бейнебақылау, жасанды интеллект арқылы қала басқару және тұрғындардың қатысуы қамтылмақ.
Қауіпсіздік – басты сұраныс
Қоғамдық кеңес жүргізген онлайн сауалнама нәтижелері мынадай болды:
- 85% астаналық мектептер мен балалардың қауіпсіздігін бірінші орынға қойды;
- 51% жол-көлік оқиғаларын азайтуды қолдайды;
- 46% қаладағы барлық аудан, соның ішінде шеткі аумақтар да бейнебақылаумен қамтылуы тиіс деп есептейді;
- 91% жасанды интеллектке негізделген орталықтандырылған камера жүйесін қолдайды.
Көпшілік қазақстандық IT-мамандардың жобадағы рөлін қолдағанымен, қосымша оқыту мен қолдаудың қажеттігін атап өтті.
Жеке инвестиция және жаңа технология
Қаланың Цифрландыру және мемлекеттік қызметтер басқармасының басшысы Берік Ахметовтің айтуынша, елордадағы барлық 16 тұрғын массив пен бір саяжай массиві бюджет қаржысынсыз, жеке инвестиция есебінен интернетке қосылған.
«Мақсатымыз – тек камера орнату емес, көлік, ТКШ, қауіпсіздікті біріктіретін кешенді жүйе құру. Барлық ақпарат жедел әрекет етуге мүмкіндік беретін Ситуациялық орталыққа жинақталады», – деді ол.
Жасанды интеллект пен халықаралық тәжірибе
Presight AI Kazakhstan өңірлік директоры Мәқсат Қошымбаев жобаның техникалық қырын таныстырды. Оның айтуынша, жасанды интеллектке негізделген жаңа Ситуациялық орталық пен деректерді өңдеу орталығы құрылмақ.
«Бейнеаналитика тек жол ережесі бұзушылықты емес, қауіпті жағдайларды да анықтайды. Барлық жүйенің интеграциясы үкіметтің суперкомпьютерін тиімді пайдалануға жол ашады», – деді ол.
Сонымен бірге жобаның кемінде 60%-ын қазақстандық IT-компаниялар жүзеге асырады, бұл саладағы кадрлар әлеуетін арттырып, жаңа жұмыс орындарын ашпақ.
Қоғамдық пікір
Мәслихат депутаттары мен тұрғындар жобаға қолдау білдіріп, мектептер мен аулаларға камера орнатуды, бейнебақылауды барлық ауданға таратуды, тұрғын үйлердің кіреберісі мен лифттерін қорғауды ұсынды.
Қоғамдық кеңес мүшесі Аяжан Өтеуова кездесуді түйіндеп:
«Ақылды қала – бұл болашақтың концепциясы емес, бүгінгі сұранысқа берілетін жауап. Ең басты басымдық – қауіпсіздік», – деді.
Ұсыныстар тиісті органдарға жолданатын болады. Smart City – тұрғындарға қолайлы, қауіпсіз әрі технологиялық қала құруға бағытталған қадам.
