RUS
SMARTNEWS.KZ басылымының хабарлауынша, Қырғызстанда Жеңіс шыңында альпинист Наталья Наговицынаға қатысты іздестіру жұмыстары жалғасуда. 27 тамызда вице-премьер – ҰҚМК төрағасы Камчыбек Ташиевтің тапсырмасымен заманауи технологияларды қолдана отырып, кезекті кешенді іздестіру-құтқару операциясы өтті.
«Операция аясында дрондар арқылы жоғары дәлдіктегі құралдармен аэровидео түсірілім жүргізілді. Қатты жел соққан қолайсыз ауа райына қарамастан, тепловизор көмегімен мониторинг кадрлары алынды», – делінген хабарламада.
Алайда алынған мәліметтерді талдау нәтижесінде, альпинистің орналасқан аумағында тіршілік белгілері байқалмаған.
Наговицына жоғалғаннан кейін оның ұлы Ресейдің Бас прокурорына, Сыртқы істер министріне және Қырғызстандағы Ресей елшісіне анасына көмек көрсету жөнінде өтініш жасаған еді. Кейін бұл іске Ресейдің Тергеу комитеті де араласқаны хабарланған.
25 тамызда Ресей Альпинизм федерациясының мүшесі, Mountain.ru порталының бас редакторы Анна Пиунова құтқарушылар дронмен тағы бір рет ұшу жасамақ болғанын, егер Наталья тірі болса, Қырғызстан ТЖМ-нің Eurocopter тікұшағымен итальяндық пилоттың көмегімен эвакуациялау жоспарланғанын жазған.
Мамандардың айтуынша, альпинистің денесі кемінде көктемге дейін тауда жатады. Себебі 2025 жылғы өрмелеу маусымы аяқталды, ал палаткасын іздеу жұмыстары 2026 жылға дейін басталмайды.
Еске сала кетейік, Наталья түсіп келе жатқанда аяғын сындырып, өздігінен қозғала алмай қалған. Жолдастары мен құтқарушылар оны бірнеше рет эвакуациялауға тырысқанымен, ауа райы мүмкіндік бермеді. Құтқаруға келген альпинистердің бірі қаза тапты.
Айта кетейік, төрт жыл бұрын дәл осы тауда, көрші шыңда Натальяның күйеуі Сергей қаза болған. Әйел бұл жолғы өрмелеуге оның құрметіне естелік тақтайша орнату үшін шыққан еді.