RUS
SMARTNEWS.KZ басылымының хабарлауынша, Еуропалық одақ Ресейдің бұғатталған активтерінің бір бөлігін Украина қалпына келтіру жұмыстарына бағыттау тетігін әзірлеуде. Бұл туралы Politico басылымы жазды.
Ақпаратқа сәйкес, бұл мәселе 30 тамызда Копенгагенде ЕО Сыртқы істер министрлерінің кездесуінде талқыланады.
Құжатта активтерді бірден тәркілеу қарастырылмаған. Көптеген мемлекеттер мұндай қадамға қарсы, себебі ол құқықтық және қаржылық тәуекелдерге әкелуі мүмкін. Оның орнына Брюссель ресейлік активтерді «жоғары тәуекелді инвестициялар» санатына енгізіп, одан түсетін пайданы арттыруды көздеп отыр.
Бұл үшін ЕО арнайы құрылым құруды қарастырып жатыр. Оған ЕО елдерімен қатар G7 тобының мүшелері – Ұлыбритания мен Канада да кіруі мүмкін. Мұндай тәсіл Еуропаға активтерді көбірек бақылауға мүмкіндік береді. Қолданыстағы ережелер бойынша, кез келген ел санкцияны ұзартуға вето қойып, активтерді Ресейге қайтара алады. Жаңа механизм бұл шектеуді айналып өтуге жол ашады.
2024 жылы G7 елдері Ресейдің бұғатталған активтерінен түскен табыстың €45 млрд көлемін Киевке бөлуге келіскен болатын. ЕО мен G7 елдеріндегі Ресей активтерінің жалпы көлемі шамамен €280 млрд – бұл елдің алтын-валюта қорының жартысына жуығы. Дегенмен, Еуроодақ оларды тәркілеуге заңды негіз таппай отыр, себебі бұл еуроның резервтік валюта ретіндегі беделіне нұқсан келтіруі мүмкін.