RUS
SMARTNEWS.KZ басылымының хабарлауынша, қазақстандық блогер әрі «Qoslike» жобасының қатысушысы Ағлан Ақпан бірнеше адамды «Австралияға жұмысқа орналастырамын» деп алдап кеткені белгілі болды.
Жәбірленушілердің айтуынша, олар блогердің Instagram арқылы жариялаған жарнамасына сеніп, қомақты қаражат берген. Бірақ екі жылдан бері ақшаларын қайтара алмай жүр.
«Инстаграмдағы жарнамасын көрдік. Ағлан Ақпан өзі сөйлеп, сендірді. Сиднейге барып, құрылысшы болып жұмыс істейміз деп ойладық. Айына 2 миллион теңге жалақы аламыз деді. Содан бері екі жыл өтті, ақша да жоқ, ол да жоқ», – дейді алданғандардың бірі Бақыт Мәметоқаев.
Тағы бір жәбірленуші Нұрлан Төлебаев та несиеге алған ақшасын қайтара алмай отыр.
«7 миллион теңге несием бар. Австралияға кетемін деп жұмыстан шығып кеттім. Алған ақшасын қайтармай жүр. Әрқайсымыздан әртүрлі сомада алды: 360 мыңнан бастап, 1,5 миллион теңгеге дейін. Бас-аяғы 15 адам ақшамызды қайтара алмай жүрміз», – дейді ол.
Бағдарлама мәліметінше, блогердің үстінен тоғыз іс қозғалған, жеке сот орындаушылар елден шығуға тыйым салған. Бірақ Ағлан Ақпан қазір шетелден контент жариялауды жалғастырып жүр.