RUS
SMARTNEWS.KZ басылымының хабарлауынша, Сирия соңғы 14 жылда алғаш рет мұнай экспорттады. Алғашқы 600 мың баррельдік партия Жерорта теңізіндегі Тартус портынан жөнелтілген.
Сирия Энергетика министрлігінің өкілі Рияд әл-Джубасидің айтуынша, мұнайды B Serve Energy халықаралық сауда компаниясы сатып алған. Ал тасымалдау Nissos Christiana танкері арқылы жүзеге асырылады. Шенеунік бұл жеткізілімнің негізгі мақсаты — тасымал желілерінің, қоймалардың және порт инфрақұрылымының жұмысын тексеру екенін атап өтті.
Сирия мұнай тасымалдау компаниясының бас директоры Маан Пашаның сөзінше, қазіргі уақытта экспорт көлемі елдің ішкі сұранысынан асып түседі. Оның айтуынша, танкерге бірнеше кен орындарынан өндірілген мұнай және Банияс пен Хомс зауыттарында өңдеуден қалған өнімдер тиелген. Дегенмен нақты кен орындары аталған жоқ. Белгілі болғандай, Сирияның негізгі мұнай қоры елдің солтүстік-шығысында, күрдтердің бақылауындағы аумақта орналасқан.
Азаматтық соғыс басталған 2011 жылға дейін Сирия тәулігіне шамамен 380 мың баррель мұнай экспорттайтын. Алайда соғыс пен ұзаққа созылған қақтығыстар энергетикалық инфрақұрылымды қиратып, халықаралық санкциялар мұнай мен газ саудасына елеулі шектеу қойды.