RUS
SMARTNEWS.KZ басылымының хабарлауынша, Туризм және спорт министрі Ербол Мырзабосынов Жанабыловтар ұйымдастырған даулы ұтыс ойынына қатысты мәлімдеме жасады. Оның айтуынша, блогерлерге қатысты шағым жеке тұлғадан түскен.
«Қазіргі уақытта толық тексеріс жүргізіліп жатыр, іс сотқа жолданды. Қорытынды шешімді сот қабылдайды», — деді министр парламент палаталарының бірлескен отырысының кулуарында.
Басқа блогерлерге қатысты тексеріс жайында нақты ақпарат берген жоқ.
«Бұл бағыттағы жұмысты біздің комитет жүргізіп жатыр. Кімді тексеріп жатқанын айта алмаймын. Ал Жанабыловтарға қатысты айтарым: іс сотқа берілді», — деп нақтылады ол.
Министр бұл мәселеге қатысты ведомствоның ұстанымын да айтты:
«Заң аясында».
Еске салайық, бұған дейін Туризм және спорт министрлігі Ерболат Жанабылов пен Эльмира Төлегенова ұйымдастырған ауқымды ұтыс ойыны бойынша тексеріс бастаған еді. 15 миллионнан астам жазылушысы бар жұп 11 автокөлікті ұтысқа тігетінін жариялаған. Тексеруге азаматтың шағымы себеп болған: ол акцияның заңдылығына күмән келтірген. Шағым министрлікке қарасты лотерея және ойын бизнесін реттеу комитетіне түскен.