RUS
SMARTNEWS.KZ басылымының хабарлауынша, Мәжіліс депутаты Абзал Құспан Қазақстан футболындағы келісілген матчтар мәселесін көтеріп, құқық қорғау органдарын тергеу жүргізуге шақырды.
Халықаралық Sportradar деректеріне сүйенген депутаттың айтуынша, 2022 жылы Қазақстан әлем бойынша келісілген ойындар саны жөнінен төртінші орынға шыққан.
«Бұл – Қазақстан футболында әділетсіз ойындардың кең таралғанының айғағы. Футбол федерациясының президенті Марат Омаров мәселенің барын мойындағанымен, жүйелі шаралар қабылданбады. Қоғамдық ұйымдар мен БАҚ букмекерлік кеңселердің көптеген матчтарды тізімнен алып тастағанын анықтап отыр», – деді Құспан.
Ол сондай-ақ халықаралық тәжірибені мысалға келтірді:
Германияда төреші келісілген матчтар үшін 2 жыл 5 айға сотталған;
Оңтүстік Кореяда 2011 жылы 57 футболшы айыпталған;
Италияда 2015 жылы клуб президенті мен ондаған адам сотқа тартылып, команда еурокубоктардан шеттетілген.
Депутаттың айтуынша, келісілген матчтар тек спорттағы әділетсіздік емес, сонымен қатар мыңдаған азаматқа қарсы қаржылық алаяқтық түрі.
«Бақылаудың әлсіздігі азаматтардың сенімін жоғалтып қана қоймай, ел экономикасының тұрақтылығына да қауіп төндіреді», – деді ол.
Сондықтан Құспан құқық қорғау органдарын тарта отырып, футболдағы келісілген ойындарға қатысты арнайы тергеу ұйымдастыруды ұсынды.