RUS
SMARTNEWS.KZ басылымының хабарлауынша, депутат Дәулет Тұрлыхановтың ұлы Нурасыл Болат жазасын жеңілдету туралы өтінішін қанағаттандырмады.
Алатау қалалық соты сотталушының қалған мерзімді жұмсақ жаза түріне ауыстыру туралы өтінішін қарап, негіз жоқ деп тапты.
Сот материалдарына сәйкес, 2024 жылдың қазанында Болат бірнеше рет пробациялық бақылау шарттарын бұзғандықтан, оған тағайындалған «бостандығын шектеу» жазасы қатаңдатылып, «бас бостандығынан айыру» жазасына ауыстырылған. Ол түнде көшеде және ойын-сауық орындарында жүрген жерінен ұсталған.
«Бұл жолы да сот оның тәртібін саралап, оң өзгерістердің байқалмағанын атап өтті. Болат түзелгенін дәлелдей алмады, сондықтан орташа қауіпсіздік колониясында жазасын өтеуді жалғастыруы тиіс», – делінген сот шешімінде.
Өтінішті сотталушының өзі, жәбірленуші және ішінара прокурор қолдағанымен, сот шешімін өзгертпеді. Үкім заңды күшіне енген жоқ.
Айта кетейік, Нурасыл Болат бұған дейін де жазасын жеңілдетуге тырысқан. Алайда 2025 жылдың наурызында ол құжаттағы қателерге байланысты өтінішін қайтарып алған. Оның қорғаушылары колония әкімшілігінің заңбұзушылықтарын айтып, істің қоғамға жария болғанына қарсылық білдірген.
Нурасыл Болат адвокаттар Анна мен Олег Черновтарға жасалған шабуыл ісі бойынша сотталған. Бұл оқиға Алматыдағы сауда орталығының алдында қызбен жанжалдан кейін болған еді.