RUS
SMARTNEWS.KZ басылымының хабарлауынша, Қазақстандық жанкүйерлер көптен күткен «Қайрат» – «Реал» матчының билеттері қашан сатылымға шығатыны анықталды. Бұл туралы Туризм және спорт вице-министрі Серік Жарасбаев Орталық коммуникациялар қызметіндегі баспасөз мәслихатында мәлімдеді.
Спикердің айтуынша, қазіргі таңда ФК «Қайратпен» тікелей келіссөздер жүріп жатыр.
«Билеттерді сату құқығы тікелей «Қайратқа» тиесілі. Қолымыздағы ақпаратқа сәйкес, сатылым ойынға 10 күн қалғанда басталады. Егер матч 30 қыркүйекте өтсе, онда шамамен 20-сы күндері сатылымға шығуы мүмкін. Барлық жанкүйерлерге айтарым – бейресми ақпарат көздеріне сенбеңіздер. Билеттер тек клубтың ресми сайты мен әлеуметтік желідегі парақшалары арқылы таратылады», – деді Жарасбаев.
Еске сала кетейік, 28 тамызда Монакода өткен жеребеде «Қайрат» Чемпиондар лигасының 2025/26 маусымындағы қарсыластарын білді. Команданың реакциясы түсірілген бейнежазба клубтың ресми парақшаларында жарияланды.
Тарихи матч Алматыда 30 қыркүйек күні өтеді. Бұған дейін «Қайрат» билеттердің сатылымға шыққаны туралы тараған ақпаратты жоққа шығарған болатын.
Алматы қаласының полициясы да тұрғындар мен қонақтарды алаяқтарға алданып қалмау үшін билеттерді тек ресми арналардан алуға шақырды.