RUS
SMARTNEWS.KZ басылымының хабарлауынша, АҚШ-тың бұрынғы президенті Джо Байденге тері обырына байланысты ота жасалып, ол қазір қалпына келу үстінде.
Байденге ота Моос әдісімен жасалған. Дәрігерлер бұл тәсілді тері қатерлі ісігін емдеудің ең тиімді жолдарының бірі деп санайды. Қашан нақты жасалғаны айтылмағанымен, тамыз айының соңында түсірілген видеода оның Делавэрдегі шіркеуден шыққаны және басында жаңа тыртық бары байқалған.
Бұл Байденге жасалған алғашқы операция емес. 2023 жылы президент болып тұрған кезінде оның кеудесінен обыр жасушалары алынып тасталған еді. Сол жылы әйелі Джилл Байденге де осындай ота жасалды – дәрігерлер қатерлі жасушаларды көз үстінен және кеудесінен кесіп алған.
Сонымен қатар, биыл мамырда 82 жастағы Байденге қуықасты безінің қатерлі ісігі диагнозы қойылған. New York Times мәліметінше, дәрігерлер ісіктің агрессивті түрге ауысқанын және сүйекке метастаз бергенін анықтаған.
АҚШ-тың қазіргі президенті Дональд Трамп бұл диагнозды бұрын жасырған болуы мүмкін деген болжам айтқан. Дегенмен Байденнің өкілдері мұны жоққа шығарды. Трамп оның сауығып кетуіне тілектестік білдірді.