RUS
SMARTNEWS.KZ басылымының хабарлауынша, Израиль мен Францияның дипломатиялық қарым-қатынасы күрделене түсті. Бұған Францияның Палестина мемлекетін мойындау туралы ұстанымы себеп болды.
Израильдің Кнессет депутаты Шарен Хаскельдің айтуынша, премьер-министр Биньямин Нетаньяху Иерусалимдегі Франция консулдығын жабу мәселесін қарастырып жатыр. Ол бұған дейін де Эммануэль Макронды «ХАМАС-қа сыйлық жасады» деп айыптаған болатын.
Израиль билігі, егер Париж шешімінен қайтпаса, елдегі және аннексияланған аумақтардағы француз нысандарын, соның ішінде Шығыс Иерусалимдегі «Патшалар қабірін» тәркілеуі мүмкін екенін ескертті.
Сыртқы істер министрі Гидеон Саар Франция президентінің Израильге ресми сапарына ешқандай мүмкіндік жоқ екенін мәлімдеді. Оның сөзінше, «Франция Израиль мүдделеріне қайшы бастамаларын жалғастырып отырған шақта, мұндай кездесудің негізі болмайды».
Ал Париж тарапы егер Израиль консулдықты жауып, шектеулер енгізсе, жауап ретінде өз еліндегі Израиль консулдығын жабуы, дипломатиялық паспорттар санын қысқартуы немесе «Мосад» қызметіне шектеу қоюы мүмкін екенін жеткізді.
Эммануэль Макрон осы аптада Франция мен Сауд Арабиясы БҰҰ-да өтетін «екі мемлекет шешімі» жөніндегі конференцияға тең төрағалық ететінін хабарлады. Ол ешқандай әскери операция немесе аннексия әрекеті Палестинаны мойындау процесін тоқтата алмайтынын айтты.
Франция президенті сонымен бірге АҚШ-тың палестиналық делегация мүшелеріне виза бермеу шешіміне өкінішін білдірді.
Еске салсақ, екі ел арасындағы дипломатиялық дағдарыс өткен жылдың тамызында басталған. Сол кезде Нетаньяху Макронды «антисемитизмді өршітуге ықпал етіп отыр» деп айыптаған. Ал француз лидері оған жауап ретінде Палестинаны мойындау Израильдің қауіпсіздігін қамтамасыз етудің ең дұрыс жолы екенін мәлімдеген.