RUS
SMARTNEWS.KZ басылымының хабарлауынша, АҚШ Қорғаныс министрлігін «Әскери министрлік» деп қайта атау жөніндегі Дональд Трамптың жарлығы Пентагон қызметкерлерінің қарсылығын тудырды. Бұл туралы Politico жазды.
Басылым дерегінше, көптеген қызметкерлер жаңа шешімге байланысты «реніш, ашу және түсінбеушілік» білдірген. Олар атауды өзгертудің әскер алдында тұрған нақты мәселелерді шешуге еш көмегі болмайтынын айтады.
Жаңа жарлыққа сәйкес, министрліктің мөрлері мен логотиптері 40 елдегі және АҚШ-тың барлық 50 штатындағы 700 мыңнан астам нысанда қайта жасалуы керек. Өзгерістер форма, ресми бланкілер, Пентагон дүкеніндегі тауарлар мен асханалардағы қарапайым салфеткелерге дейін әсер етеді.
Қорғаныс министрлігінің бұрынғы қызметкері бұл бастамаға миллиондаған доллар қажет болатынын айтты. Оның пікірінше, бұл жаңашылдық АҚШ армиясының нақты проблемаларын шешпейді, керісінше «елді соғыс құмар және тұрақсыздық көзі ретінде көрсетуге» мүмкіндік береді.
Министрліктің тағы бір шенеунігі енді өзін «Әскери министрліктің өкілі» деп атауды сұраған. Оның айтуынша, шығындар жарлық орындалған сайын өзгеріп отырады.
Айта кетейік, бүгін Дональд Трамп АҚШ Қорғаныс министрлігін «Әскери министрлік» деп қайта атау туралы жарлыққа қол қойды. Ол 1947 жылы ведомствоның атауы өзгергеннен бері АҚШ «бірде-бір соғыста жеңіске жеткен жоқ» деп мәлімдеді.