RUS
SMARTNEWS.KZ басылымының хабарлауынша, Мемлекет басшысы Қасым-Жомарт Тоқаев Жолдауында елімізде бір палаталы парламент құру туралы бастама көтерді.
«Мен Сенатқа он жыл басшылық еттім. Бұл әрқашан зор мәртебе әрі үлкен жауапкершілік болды. Сондықтан дәл осы мінберден парламенттік реформа туралы сөз қозғау оңай емес. Соған қарамастан бүгін бір палаталы парламент құру мәселесін күн тәртібіне шығарғым келеді», – деді президент.
Тоқаевтың айтуынша, бұл – аса маңызды мәселе, сондықтан асығыс шешім қабылдауға болмайды.
«Реформа азаматтық секторда, сарапшылар арасында және қазіргі парламенттің өзінде жан-жақты талқылануы қажет. Оның мәні ерекше болғандықтан, пікірталасқа кемінде бір жыл уақыт беру керек деп ойлаймын. Содан кейін, яғни 2027 жылы жалпыұлттық референдум өткізуге болады. Конституцияға өзгерістер енгізу де соның нәтижесіне байланысты болмақ. Бұған дейін айтқанымдай, мемлекеттің тағдырын айқындайтын барлық мәселе халықтың келісімімен ғана шешіледі», – деді Қасым-Жомарт Тоқаев.