Зейнетақы қорынан «тіс емдеуге» 200 млрд теңге жымқырылған

SMARTNEWS.KZ басылымының хабарлауынша, БЖЗҚ-нен азаматтардың зейнетақы жинақтары негізінде 200 миллиард теңге жалған стоматологиялық қызмет арқылы ұрланған. Бұл туралы президент Қасым-Жомарт Тоқаевқа Қаржы мониторингі агенттігінің төрағасы Жанат Елиманов баяндады.

Елимановтың айтуынша, ведомство «көлеңкелі ақшаға» қарсы іс-қимыл шеңберінде бірқатар ірі қаржылық бұзушылықтарды анықтаған. Атап айтқанда:

жалған компаниялар арқылы 24 млрд теңгеден астам қаржы қолма-қолға айналдырылған;

20 заңсыз криптобиржа мен ТМД-дағы ең ірі, 200-ге жуық есірткі дүкенімен байланысты сервис жабылған;

9,7 млн доллар көлеміндегі виртуалды активтер бұғатталған;

17,1 млрд теңгенің мұнай өнімдерін шекарадан шығару әрекеті тоқтатылған.

Сонымен қатар, бюджет қаражатын тиімсіз жұмсаудың алдын алу арқылы 164 млрд теңге сақталған. Агросубсидиялар бойынша 11 млрд теңгені талан-таражға салудың да жолын кесті.

Кездесу қорытындысында мемлекет басшысы ҚМА басшылығына бірқатар нақты тапсырма берді.