RUS
SMARTNEWS.KZ басылымының хабарлауынша, Мәжіліс Халықаралық еңбек ұйымының «Ең төменгі жалақыны белгілеу туралы» конвенциясын ратификациялау жөніндегі заң жобасын қабылдады. Бұл құжат Қазақстанды әлемдік стандарттарды сақтап, БҰҰ-ға тұрақты түрде есеп беруге міндеттейді.
Еңбек және халықты әлеуметтік қорғау министрі Светлана Жақыпованың айтуынша, конвенция негізгі үш принципке сүйенеді:
ең төменгі жалақы жүйесін енгізу;
экономикалық факторлар мен қызметкерлердің қажеттілігін ескеру;
еңбекақы төлеуде кемсітушілікке жол бермеу.
Министрдің сөзінше, бұл талаптар іс жүзінде былтырдан бері қолданылып келеді. 2024 жылы ең төменгі жалақыны есептеудің жаңа әдістемесі бекітіліп, ол медиандық жалақы мен еңбек өнімділігіне негізделген.
«Бұл тәсіл әлеуметтік әділеттілік пен экономикалық тиімділіктің арасындағы тепе-теңдікті қамтамасыз етеді», – деді Жақыпова.
Айта кетейік, бүгінде Қазақстанда ең төменгі жалақы мөлшері – 85 мың теңге.