RUS
SMARTNEWS.KZ басылымының хабарлауынша, әлеуметтік желідегі даулы пікір Алматы полициясының назарын аударды. Ерекше балаларға қарсы өрескел сөздер жазған әйелге қатысты қылмыстық іс қозғалды.
Ұлттық Autism Kazakhstan ассоциациясына ата-аналардан шағымдар көптеп түскен. Олар блогер Райхан Жұмамуратованың Instagram-парақшасындағы пікіріне наразылық білдірген. Ассоциация бұл мәселені Бас прокуратура мен Ішкі істер министрлігіне ресми түрде жолдады.
Мәселе — 23 тамызда Алматыда болған оқиға жайлы жазбаның астындағы пікірге қатысты. Ол жерде 13 жастағы жасөспірімнің әрекетінен екі жасар бала зардап шеккені айтылған. Осы жазбаның астына блогер «аутизмі бар балаларды өлтіру керек» деген мазмұндағы пікір қалдырған.
Полиция блогердің тұлғасын анықтап, ҚР заңнамасына сәйкес шара қолданылатынын мәлімдеді.
— Орынсыз сөздер мен зорлық-зомбылықты насихаттайтын әрекеттер үшін әкімшілік те, қылмыстық та жауапкершілік қарастырылған, — деп ескертті Алматы ПД.
Бұл жағдай қоғамда кең талқыға түсті. Бұған дейін де ерекше балаға қатысты келеңсіз оқиға тіркелген: елордада автобуста алты жасар аутизмі бар Анисаға белгісіз жолаушы тіл тигізген еді. Осыдан кейін «Аутизм Қазақстан» ұйымы қоғамды түсіністік пен мейірім танытуға шақырған болатын.
Балалардың құқықтары жөніндегі уәкіл Динара Закиева да осы мәселеге пікір білдіріп, қоғамды инклюзияны қолдауға үндеді.