RUS
SMARTNEWS.KZ басылымының хабарлауынша, әнші Алла Пугачёва журналист Катерина Гордееваға берген үлкен сұхбатында отбасы жайлы, соның ішінде туған ағасының қасіретті тағдырын айтты. Ол кеңес заманында Қазақстанда әскери қызметте жүріп, Семей ядролық полигонында радиацияға ұшыраған.
«Алдымен ол тамаша байланыс маманы ретінде қызмет етті. Семейде, Қытай шекарасында әскери борышын өтеді. Сол кезде сәулеге ұшырады. Салдарынан балалары өлі туған. Кейін оны тағы да Ауғанстанға жіберді», — деп еске алды Алла Пугачева.
Пугачёваның айтуынша, ағасы бала кезінен дарынды болған: тілдерді жақсы үйренген, әскери шет тілдер институтына түсуге тырысқан. Бірақ жарақаттанған саусағына байланысты қабылданбаған.
«Барлық емтиханды өте жақсы тапсырды. Ал институтқа алмады. Бұл оның өміріндегі үлкен трагедия болды, содан кейін ішімдікке салына бастады», — деді әнші.
Осыдан кейін ол байланыс училищесіне түсіп, әскери қызметін жалғастырған. Кейіннен арнайы қызметте де жұмыс істеген.
«Ол өте талантты адам еді — ән айтатын, өлең жазатын, ойнайтын. Бірақ мінезі күрделі болды, психикалық жағдайы да ауыр еді», — деді Пугачёва.
Әнші ағасының тағдыры бүкіл отбасына ауыр соққы болғанын атап өтті.
Сұхбатында Пугачёва Ресейден кету себебін де түсіндірді. Ол өз отбасына қарсы ұйымдастырылған қуғын-сүргін, жұбайы Максим Галкиннің «шетел агенті» атануы және балаларының буллингке ұшырауы негізгі фактор болғанын айтты.
«Маған атақтан артық — ар-ождан қымбат. Шындықты айту үшін кетуге мәжбүр болдым», — деді ол.
Примадонна биліктің шексіздігіне, соғыс пен донос мәдениетіне сын айтып, оны «елді жайлаған саңырауқұлаққа» теңеді. Оның сөзінше, нағыз патриотизм — түрлі пікір айту құқығын қорғау.
«Адамдардың қазасы — мейлі біздің елден болсын, мейлі басқа жақтан болсын — шыдау мүмкін емес», — деді Пугачёва.
Сондай-ақ ол балалық шағы, әкесі-фронтовик, шығармашылық жолы мен Чернобыль апатының салдарын жоюға барғандарға арналған концерттері жайлы естеліктерімен бөлісті.
Әнші екі шынайы некесін ерекше атап өтті: Миколас Орбакас және Максим Галкинмен. Қазір отбасында үйлесім мен бақыт орнағанын айтты.
Сұхбат соңында Пугачёва халыққа үндеу жасады:
«Шындықты айта біліңіздер. Өмірдің әр сәтіне қуана біліңіздер. Соғысқа табынбай, бейбітшілік үшін дұға етіңіздер».