RUS
SMARTNEWS.KZ басылымының хабарлауынша, Жетісу облысының Алакөл аудандық соты бес жастағы Сезім Рүстемқызын қағып өлтірген жүргізушіге үкім шығарды. Ол 3,5 жылға колония-қоныста жазасын өтеуге тиіс және марқұмның отбасына 5 млн теңге өтемақытөлеуге міндеттелді. Бұл туралы Orda.kz жазды.
Қайғылы оқиға 16 мамырда Достық станциясында болған. «Қазақстан темір жолы» қызметкері мас күйінде көлік айдап, жол жиегінде тұрған әйел мен екі баланы қағып кеткен. Анасы қоларбаны уақытында итеріп үлгергенімен, 5 жасар Сезім дөңгелектің астына түсіп қалған. Қызды көліктің астынан куәгерлер әрең шығарған.
Жүргізуші апаттан кейін көлігін тастап, қашып кеткен. Бала ауыр халде ауруханаға жеткізілгенімен, дәрігерлердің 10 күнгі күресіне қарамастан, 26 мамырда көз жұмды.
Ертеңінде Жақсылықов полицияға өзі келді. Алайда екі күннен соң сот оны «қылмыстың ауырлығы төмен» деп бағалап, бес баласы барын ескеріп, үй қамаққа жіберген. Бірақ кейін оның мекенжайында мүлде тұрмағаны белгілі болды.
12 қыркүйекте сот соңғы үкімді жариялады: 3,5 жыл колония-қоныс, 5 млн теңге өтемақы. Бұл шешім қыздың ата-анасын ашындырды.
«Заң бізді емес, баламыздың өліміне себеп болған адамды қорғап тұрғандай. Бұл – үкім емес, бізге жасалған қорлық. Біз кек емес, әділдік іздейміз. Егер мас жүргізушіге осындай жеңіл жаза берілсе, ертең мұндай жағдай қайталанбайды деп кім кепіл?» — деді көз жасына ерік берген анасы Назым Жылқайдарова.
Әкесі Рүстем Омаров та үкімді әділетсіз деп санап, істі қайта қарауды талап етті.
Қызынан айрылған отбасы жазаны күшейтуді және Жақсылықовтың үй қамақта жүріп қашқанына жол бергендерге де жауапкершілік жүктеуді сұрап отыр.