RUS
SMARTNEWS.KZ басылымының хабарлауынша, Қатардың премьер-министрі шейх Мохаммед бин Абдулрахман бин Джассим Әл Тани алдағы күндері Нью-Йорк пен Вашингтонға сапарлап, АҚШ президенті Дональд Трамппен және жоғары лауазымды тұлғаларымен кездеседі. Келіссөздің басты тақырыбы — Израильдің Дохадағы «Хамас» саяси бюросына жасаған соққысы.
Басылымның дерегінше, катарлық үкімет басшысы АҚШ-та вице-президент Джей Ди Вэнспен, мемлекеттік хатшы Марко Рубиомен және президенттің арнайы өкілі Стив Уиткоффпен де жүздеседі.
Politico атап өткендей, Ақ үйде Израиль премьері Биньямин Нетаньяхуға наразылық артып келеді. Себебі АҚШ әкімшілігі «Хамаспен» келіссөздер жүргізу үшін көптен бері күш салып жатқанда, Израильдің әрбір әуе шабуылы процесті үзіп тастайды.
«Әр жолы ілгерілеу болған сәтте ол (Нетаньяху) біреуді бомбылайды», — деді Трамп командасына жақын дереккөз.
Қатар премьері БҰҰ Қауіпсіздік кеңесінде сөйлеген сөзінде АҚШ пен Израиль әрекеттерінің айырмашылығына назар аударды. Ол мысал ретінде Дохада орналасқан «Талибан» саяси бюросын келтіріп, Вашингтон ешқашан келіссөз жүргізушілерге соққы бермегенін еске салды.
«Дәл сол арна Ауғанстандағы соғысты тоқтатқан келісімге алып келді», — деді ол.
Ал Израиль, оның пікірінше, жазасыздыққа сеніп, өркөкірек саясат ұстанып отыр.
Еске салсақ, Израиль армиясы (ЦАХАЛ) 9 қыркүйекте Дохада «Отты шың» («Огненная вершина») операциясын жүргізген еді. Соққы кезінде «Хамас» жетекшілерінің бірі Халиль әл-Хайидің ұлы Хаммам қаза тапты.
Араб әлеміндегі бірнеше мемлекет енді Израиль өз аумақтарына да шабуыл жасауы мүмкін деп қауіптеніп, АҚШ-тан ресми кепілдік беруді сұрай бастаған.