RUS
SMARTNEWS.KZ басылымының хабарлауынша, Ресей билігі әскери шығындардан ұлғайып кеткен бюджет тапшылығын жабу үшін салықтарды көтеру мәселесін қарастыруда. Бұл туралы 11 қыркүйекте The Bell басылымы хабарлады.
Ең ықтимал нұсқа – қосылған құн салығын (ҚҚС) 20%-дан 22%-ға дейін өсіру. Әлеуметтік маңызы бар тауарларға жеңілдік қалдыру қарастырылып жатыр.
Ақпарат көздерінің айтуынша, үкіметте басқа балама қарастырылмаған, себебі салық өсімінсіз тапшылықты жабу мүмкін емес. Қыркүйек айының соңына дейін Мәскеу Мемдумаға келесі жылдың бюджет жобасын енгізуі тиіс.
«Салықтар сөзсіз көтеріледі», – дейді Кремль мен үкіметтегі дереккөздер.
Неге дәл ҚҚС?
2019 жылы ҚҚС 18%-дан 20%-ға көтерілген болатын. Қазірдің өзінде шенеуніктердің басты талқылап отырған нұсқасы – тағы да 2 пайыздық өсім. Сарапшылардың айтуынша, бұл бюджетке жылына шамамен 1 трлн рубль әкелуі мүмкін.
Экономистер ҚҚС-ты ең «ыңғайлы» салық деп атайды: ол автоматты түрде жиналады, халық тікелей сезбейді, бірақ инфляция арқылы бағаға қосылады.
Қарапайым халыққа әсері қандай?
Нарықтағы барлық жаңа шығындар бағаға қосылатындықтан, түпкілікті салмақ тұтынушыларға түседі. Бұрынғы өсім кезінде инфляция 0,55–0,7 пайыздық тармаққа көтерілген еді.
Экономистердің пікірінше, халықтың қалтасынан алынған қосымша қаржы экономикалық өсімді баяулатып, тұтыну сұранысын төмендетеді. Шілде айында Ресей экономикасының өсімі небәрі 0,4% болып, маусымдағы 1%-дан құлдыраған.
Неге бұдан қашып құтылу мүмкін емес?
2026 жылға жоспарланған бюджетте кіріс 41,8 трлн рубль болса, шығыс – 44,2 трлн. Мұнай бағасының төмендеуі және экономиканың баяулауы бұл болжамды күмәнді етіп отыр.
Соғыстың басталғалы бері Ресей үкіметі Ұлттық әл-ауқат қорының жартысынан көбін жұмсап үлгерді: 2022 жылғы 8,8 трлн рубльден 2025 жылдың қыркүйегінде 3,9 трлн-ға дейін қысқарды. Сарапшылардың айтуынша, резервтер сарқылса, үкімет қосымша қарызға барып, жаңа салық ауыртпалығын арттыруға мәжбүр болады.