RUS
SMARTNEWS.KZ басылымының хабарлауынша, Түркістан облысы Шардара ауданында қарт адамның өліміне байланысты тергеу аясында тағы бір күдіктіге қатысты қылмыстық іс қозғалды. Бұл жолы айыпталушылар қатарында марқұмның ұлының жұбайы да бар.
Облыстық полиция департаментінің хабарлауынша, бұған дейін күдікті ұл қамауға алынып, оған Қылмыстық кодекстің «Жәбірленушінің өліміне әкеп соққан қасақана ауыр дене жарақатын келтіру» бабы бойынша айып тағылған еді.
Тергеу барысында әйелдің де оқиғаға қатысы бар деген күдік туындап, оған қатысты ҚК-нің «Топ болып жасалған ұрып-соғу» бабы бойынша сотқа дейінгі тергеу басталды.
«Қазіргі таңда болған оқиғаның барлық мән-жайын анықтау үшін тергеу жалғасып жатыр. Соның қорытындысы бойынша барлық қатысушының әрекетіне құқықтық баға беріліп, процессуалдық шешім қабылданады», – деп мәлімдеді ведомство.
Полиция баспасөз қызметінің дерегінше, бұған дейін марқұмнан да, өзге азаматтардан да отбасындағы зорлық-зомбылық туралы ешқандай арыз түспеген.
Тергеу мүддесіне байланысты өзге мәліметтер жария етілмейді.