RUS
SMARTNEWS.KZ басылымының хабарлауынша, Атырау тұрғыны үш жасар бүлдіршінге полицияға шағым түсірген. Оған себеп — балалар арасындағы ойыншыққа талас.
Әлеуметтік желідегі Threads платформасында осы жағдайға қатысты үш жасар қыздың анасы жазба қалдырған. Оның айтуынша, оқиға кафе ішінде болған.
«Қызым ойыншық шаңсорғышты алып ойнап отырды. Сәл үлкендеу қыз одан тартып алмақ болды. Сол кезде анасы келіп, айқайлап, «қызыңызға тәрбие беріңіз» деді. Балалар арада он минут өтпей-ақ бірге ойнап кетті. Бірақ әлгі әйел полицияға арыз жазып, тіпті үш жасар қызымнан өзінің бес жасар қызының алдында кешірім сұрауын талап етті», – дейді ол.
Атырау облыстық полиция департаменті бұл жағдайды растады.
«Арыз полицияға түсті. Факті бойынша тексеру жүргізіліп, баланың ата-анасымен профилактикалық әңгіме өткізілді. Заң бойынша жасөспірім емес, үш жасар балаға қатысты шағым қабылданбайды. Сондықтан арыз қараусыз қалдырылды», – деп мәлімдеді ведомство.