RUS
SMARTNEWS.KZ басылымының хабарлауынша, Ақтөбе облысының Әйтеке би ауданындағы Қайрақты өзенінен 108 киік өлексесі шығарылды. Оның ішінде 60-ы аталық, 48-і аналық. Барлығы залалсыздандырылып, көмілген.
Облыстық орман шаруашылығы және жануарлар дүниесі аумақтық инспекциясының басшысы Әділкерей Әуелбаевтың айтуынша, суатқа 10 мыңға жуық киік келген. Өзеннің кей бөлігі тартылып қалғанымен, терең тұстарында су сақталған. Жануарлар шөліркеп су ішпек болғанда бір-бірін таптап, шығынға ұшыраған болуы мүмкін.
«Өзеннің екінші жағында қалың қамыс бар, киік өте алмайды. Мыңдаған бас бір жерге жиналғанда өзара қыспаққа түсіп, қырылып қалуы ықтимал деген болжам бар. Сонымен қатар экология департаменті мен ветеринариялық қызмет мамандары судан сынама алды. Сараптама қорытындысы кейінірек жарияланады. Адам шығыны жоқ. Оқиға орнында 22 адам мен 8 техника жұмыс істеді», – деді Әуелбаев.
Ресми мәліметке сүйенсек, Ақтөбе өңірінде қазіргі таңда 300 мыңнан астам киік бар.