RUS
SMARTNEWS.KZ басылымының хабарлауынша, Қатар астанасында араб және мұсылман елдерінің сыртқы істер министрлері бас қосып, Израильдің Дохадағы әуе соққысына қатысты ортақ ұстаным қалыптастыруды талқылап жатыр. Аталған шабуыл кезінде бес ХАМАС мүшесі мен бір катарлық қауіпсіздік қызметкері қаза тапқан еді.
Қатардың премьер-министрі әрі сыртқы істер министрі шейх Мұхаммед бин Абдулрахман Әл Тани бұл оқиғаны «делдалдық принципіне жасалған шабуыл» деп атады. Оның сөзінше, Израильдің әрекеті халықаралық құқықты аяққа таптап, «мемлекеттік терроризмге» ұқсайды.
«Халықаралық қауымдастық Израильдің қылмыстарын жазасыз қалдырмауы тиіс. Қосарланған стандартты тоқтататын уақыт жетті», – деді ол саммит аясында жарияланған бейнеүндеуінде.
Саммит жобалық қарарына сәйкес, қатысушы мемлекеттер Израильдің Катарға жасаған соққысын және аймақтағы саясаттарын – «геноцид, этникалық тазарту, аштық, қоршау, отаршылдық пен экспансияны» – айыптауға дайын.
Араб мемлекеттері лигасының бас хатшысы Ахмед Әбуль Ғейт те үнсіздік жаңа қылмыстарға жол ашатынын ескертті.
Израиль тарапы ресми түсініктеме бермеді. Дегенмен премьер-министр Биньямин Нетаньяху әлеуметтік желідегі жазбасында Қатарда жүрген ХАМАС жетекшілерін «соғысты тоқтатуға кедергі жасап отырған басты тұлғалар» деп атады.
ХАМАС өкілі Бассем Наим саммит араб-мұсылман елдерінің «біртұтас әрі нақты ұстанымын» қалыптастырады деген үміт білдірді.
Айта кетейік, Қатар ұзақ жылдар бойы ХАМАС басшылығына пана беріп, өзін Израиль мен ұйым арасындағы ара ағайын ретінде көрсетіп келеді. Бұл ел АҚШ пен Мысырмен бірге аймақтағы негізгі делдалдың бірі саналады.