«Қайрат» – «Реал» матчы: билеттер қашан сатылады және бағасы қанша болады?

SMARTNEWS.KZ басылымының хабарлауынша, алматылық «Қайрат» клубы Чемпиондар лигасының жалпы кезеңіндегі барлық үй матчтарына билеттер сату тәртібін жариялады. Олардың ішінде ең күткен ойындардың бірі – «Реал Мадридке» қарсы кездесу.

Клуб мәліметінше, «Қайрат» – «Реал» ойынына билеттер 23 қыркүйекте сағат 17:00-де (Алматы уақыты) сатылымға шығады. Бір адамға (бір ЖСН бойынша) ең көп дегенде екі билеттен ғана сатып алуға рұқсат етіледі. Мәліметтер сатып алу кезінде де, стадионға кірген кезде де мұқият тексеріледі.

Билеттердің құны – 30 мыңнан 250 мың теңгеге дейін. Бұл бағалар УЕФА-мен келісілген және барлық үй матчтарына бірдей қолданылады. Клуб өкілдері мұндай саясат Чемпиондар лигасының талаптарына және халықаралық тәжірибеге сәйкес екенін атап өтті.

Сонымен қатар абонемент иелеріне өз орындарын алдын ала және жеңілдетілген бағамен алу мүмкіндігі беріледі. Дәстүр бойынша билеттердің бір бөлігі әлеуметтік және клубтық квота аясында бөлінеді: олар академия тәрбиеленушілеріне, филиал ойыншыларына, паралимпиадалық спортшыларға, клуб ардагерлері мен қызметкерлеріне беріледі.

Айта кетейік, «Қайрат» пен мадридтік «Реал» арасындағы ойын 30 қыркүйекте Алматының Орталық стадионында өтеді. Басталуы – 21:45.

Еске сала кетсек, жақында «Қайраттың» негізгі қақпашысы Темірлан Анарбеков премьер-лиганың 23-турындағы матчта жарақат алып, алдағы кездесулерге қатыса алмайтыны белгілі болды.