RUS
SMARTNEWS.KZ басылымының хабарлауынша, Нариман Құрбанов Германияда өткен FIG World Challenge Cup – 2025 халықаралық турнирінде ат снарядындағы жаттығуда топ жарып, чемпион атанды.
Қазақстандық спортшы финалда 15.066 ұпай жинап, үздіктер қатарында бірінші орыннан көрінді. Күміс медальді армениялық Гамлет Манукян (14.800), қола жүлдені италиялық Габриэль Таргетта (14.733) иеленді.
1997 жылы дүниеге келген Нариман Құрбанов – қазақстандық спорттық гимнастиканың жарқын жұлдыздарының бірі. Ол 2024 жылғы Париж Олимпиадасында финалда 15.433 ұпай жинап, күміс жүлдеге қол жеткізген болатын. Бұған дейін үш мәрте Азия чемпионы атанып (2023, 2024, 2025), 2022 жылғы Азия ойындарында қола жүлде жеңіп алды.
Нариман гимнастикаға небәрі бес жасынан келген. Алғашқы бапкері – өз әкесі. Оның айтуынша, табандылығы мен еңбегінің арқасында әлемдік аренада Қазақстанның атын шығару – бала күнгі арманы болған.
Жерлесіміздің кезекті жеңісі еліміздің спорт тарихына тағы бір жарқын бет қосты.