RUS
SMARTNEWS.KZ басылымының хабарлауынша, Талдықорғанда жеке сот орындаушысы алимент төлемдерін заңсыз иемденіп, балаларды өздеріне тиесілі қаржысынан айырған. Бұл туралы қалалық прокуратура хабарлады.
Тергеу дерегінше, сот орындаушысы жұмыс берушілерден борышкерлердің жалақысынан ұсталған алимент қаражатын қабылдап, оның басым бөлігін өз қалтасына басқан. Тек азғантай бөлігін ғана алушыларға аударып отырған.
Мәселен, бір жағдайда 2025 жылдың сәуір-маусым айларында оның есепшотына 570 мың теңгеден астам алимент түскен. Бірақ ол соның небары 170 мың теңгесін ғана тиісті адамға жолдаған, қалғанын иемденген.
Тексеру барысында мұндай әдісті бірнеше рет қолданғаны анықталды. Жалпы шығын көлемі 2 млн теңгеден асты.
Аталған фактілер бойынша Талдықорған прокуратурасы ҚР Қылмыстық кодексінің 251-бабы («Өкілеттіктерін асыра пайдалану») бойынша сотқа дейінгі тергеу бастады.