RUS
SMARTNEWS.KZ басылымының хабарлауынша, Қарағанды облысында мектеп мұғалімі жас қызды күштеп көлікке отырғызып, ауылына алып кеткен. Бойжеткеннің ата-анасы оны дер кезінде құтқарып, полицияға арызданғанымен, қылмыстық іс он айдан бері созылып келеді.
Оқиға өткен жылдың желтоқсан айында болған. 23 жастағы жігіт қызбен екі аптадай кездескеннен кейін қарым-қатынасты үзгісі келгенін естіген соң, оны жұмыстан шыққанда достарымен бірге ұстап әкеткен. Қызды көлікке күштеп отырғызып, ауылына жеткізген. Жолда ол ата-анасына геолокацияны жіберіп үлгерген.
Ауылға барған кезде жігіттің туыстары ақ орамал ұстап күтіп тұрған. Алайда қыздың жақындары дереу жетіп, оны алып кеткен.
«Ол мені қорқытып, амалсыз келісесің деді. Әлі күнге дейін бостандықта жүргеніне қорқамын», – дейді бойжеткен.
Қыздың арызы полицияда бір жарым айдан кейін ғана тіркелген. Бірақ істің қозғалғанына 10 ай өтсе де, нәтиже жоқ. Туыстары аудандық, облыстық және Бас прокуратураға шағымданғанымен, әр жолы «күте тұрыңыздар» деген жауап алған.
«Куәгер бар, бейнежазба бар. Неге іс сотқа жетпейді? Бізден істі жауып тастау үшін ақша сұрады. Келіскен жоқпыз. Ол заң бойынша жазалануы керек», – дейді жәбірленушінің анасы.
Қазір іс «Адам ұрлау» бабымен тергеліп жатыр. Қазыбек би ауданының прокуратурасы қыздың ата-анасын жеке қабылдап, тергеудің жайын түсіндіргенін хабарлады.