Алматыда ерлі-зайыптылардың көлігін бөгеп, жанжал шығарған екі ер адам ұсталды
Ерлі-зайыпты қаскөйлерден аман-есен құтылған.
SMARTNEWS.KZ басылымының хабарлауынша, Алматыда жол үстінде ерлі-зайыптыларға шабуыл жасаған екі ер адам ұсталды. Оқиға Алатау ауданында болған.
Полиция дерегінше, белгісіз екі азамат ерлі-зайыптылардың көлігін әдейі бөгеп, арандатушылық әрекеттер жасаған. Жәбірленушілер сабыр сақтап, көліктен түспей, жағдайды бейнежазбаға түсіріп, дереу «102»-ге қоңырау шалған.
Полиция қызметкерлері жедел жетіп, құқық бұзушыларды ұстады. Олар ұсақ бұзақылық үшін жауапқа тартылып, сот шешімімен біреуі – 5 тәулікке, екіншісі – 7 тәулікке әкімшілік қамауға алынды.
«Азаматтардың дер кезінде хабарласуы және болған жағдайды бейнетіркеуге алу жанжалдың ушығып кетуіне жол бермеді. Тұрғындарға қырағылығы үшін алғыс айтамыз. Мұндай жағдайда ең бастысы – сабыр сақтау, оқиғаны тіркеу және дереу полицияға хабарласу», – деді Алатау аудандық полиция басқармасының бастығы Еділхан Байғараев.
Материал авторы
