RUS
SMARTNEWS.KZ басылымының хабарлауынша, Қазақстандық жолаушылар пойыздарында Илон Маск негізін қалаған Starlink спутниктік интернеті орнатыла бастады. Бұл туралы «Жолаушылар тасымалы» АҚ басқарма төрағасы Ануар Ахметжанов брифинг барысында мәлімдеді.
Оның айтуынша, алғашқы тестілік қосылулар жақсы нәтиже көрсеткен. Енді компания интернетті тағы екі стандартты пойызға енгізуді жоспарлап отыр.
«Starlink жақында ғана нарыққа шықты, біз оны іске қостық. Байланыс сапасы жаман емес, бірақ ел аумағы кең болғандықтан, әр өңірде сынап көру қажет. Әзірге ең оңайы – "Тальго" пойыздарына орнату. Қазір бізде 25 құрам бар, егер экономикалық тұрғыдан тиімді болса, барлығына қосамыз», — деді Ахметжанов.
Ол сондай-ақ интернет жүйесін стандартты пойыздарда да сынау жоспарланғанын атап өтті. Қазан айында «Ақтөбе–Алматы» және «Қызылорда–Семей» бағытындағы пойыздарда пилоттық режимде орнату басталмақ.
«Жыл соңына дейін технологияны басқа бағыттарда да сынап көреміз. Егер нәтиже оң болса, жобаны кеңейтуге дайынбыз. Қазір серіктесіміз бар», — деп нақтылады ол.
Еске сала кетейік, биылғы қаңтарда Қазақстанда пойыздарға интернет енгізу бойынша пилоттық жоба басталған еді. Алғашқы сынақ «Астана–Алматы» бағыты бойынша жүретін №3/4 пойызында өткен. Кейін өткен жылдың қазан айында жолаушыларға жаңа сервис қолжетімді болып, фильмдер көруге, музыка тыңдауға мүмкіндік туған.