RUS
SMARTNEWS.KZ басылымының хабарлауынша, Air Astana әуе компаниясымен Алматы арқылы ұшқан жолаушы жолжүгінен жаңа iPhone 16 Pro Max смартфонының жоғалғанын мәлімдеді.
Жолаушы багажды алған сәтте шабадан қаптамасының сәл бүлінгенін байқапты. Үйге жеткен соң, несиеге сатып алынған қымбат телефонның жоқ екенін анықтаған.
«Бұл телефонды несиеге алған едім, әлі екі жыл төлеуім керек. Біз бірден полицияға арыз жаздық. Air Astana-ға да хабарластық, бірақ олар құнды заттарды багажға салуға болмайды деп, жауапкершілікті мойнына алмады», – дейді жәбірленуші.
Компания өкілдері жағдайға өкінетінін, бірақ халықаралық тәжірибеге сәйкес жолаушыларға бағалы заттарды жолжүкке тапсырмауға кеңес берілетінін жеткізді. Сондай-ақ әуе тасымалдаушысы тергеу жүргізіп жатқан құқық қорғау органдарына көмек көрсетуге дайын екенін мәлімдеді.
Жолаушының сөзінше, мәселе тек телефонның жоғалуында емес, әуе компаниясының жауапкершілік алмауында.