RUS
SMARTNEWS.KZ басылымының хабарлауынша, Алматыдағы Teatralka мейрамханасында келуші қыздың даяшыға аяғын сүрткізген сәті түсірілген видео әлеуметтік желіде тарады. Бұл жағдай жұртшылықтың ашуын туғызып, қызу талқыланды.
Кадрдан бойжеткеннің дөрекі түрде аяғын көтеріп, даяшыға сүртуге мәжбүрлегенін көруге болады. Ол даяшыға:
«Саған ақшаңды төледім. Енді дұрыстап сүрт, төрт сағат бойы жалаңаяқ жүрдім», – деп сөйлеген.
Жазба авторларының айтуынша, қыз бұл «қызмет» үшін 50 мың теңге төлеген. Видеодан оның мас күйде болғаны аңғарылады.
Желі қолданушылары бойжеткеннің әрекетін сынға алып, даяшыға жанашырлық білдірді:
«Білімді, тәрбиелі адам мұндайды істемейді. Әсіресе өзі бір кездері даяшы болып жұмыс істеген жан бұлай қорламас еді». «Енді ойлаңызшы: дәл сол даяшының орнында сіздің ұлыңыз немесе бауырыңыз болса ше? Бұл – ар-намысқа ауыр соққы». «Мейрамхана басшылығы да жауапсыз. Қонаққа да, жұмысшыға да құрмет жоқ. Мұндай жағдайға куә болсаңыз, дереу полиция шақырыңыз». «Бұл қыздың артында бір «ағасы» тұрғаны анық, әйтпесе мұндай шектен шыққан әрекетке бармас еді. Дегенмен, әрбір істің жазасы болады».
Жағдайға қатысты мейрамхана әкімшілігі әзірге ресми түсініктеме берген жоқ.