RUS
SMARTNEWS.KZ басылымының хабарлауынша, Солтүстік Қазақстан облысындағы олимпиадалық резерв спорт мектебінде оқитын жетінші сынып оқушысының анасы әлеуметтік желіде видеоүндеу жариялап, баласына үлкен сыныптастары әлімжеттік көрсеткенін мәлімдеді. Бұл туралы Qazaqstan Media жазды.
Маржан есімді әйелдің айтуынша, ұлы еркін күреспен айналысады. Соңғы апталарда оның мінез-құлқынан өзгеріс байқалған.
«Бұрын бейнеқоңыраумен сөйлескенді жақсы көретін, қазір бас тартып жүр. Үйге қайтқысы келетінін айтты. Кейін білгеніміздей, интернатта қатты буллинг болып жатыр. Үлкендер оларды ұрып-соғады, тамағын тартып алады, ақша жинайды. Қарсы шыққандарға қатаң жазалаймыз деп қоқан-лоқы көрсеткен», – дейді анасы.
17 қыркүйекте ол мектеп басшылығына ресми шағым жазған. Әйел бұл істің кеңінен жария болуын қалайды.
Мәселе бойынша спортинтернатта қызметтік тергеу басталды. Тренерлер мен тәрбиешілерден, психолог пен оқушылардан түсініктеме алынды. Куәгерлер де сұралды, сондай-ақ дене жарақатын растайтын медициналық құжаттар тексерілуде.
Баланың құқығын қорғау комитеті жағдайды бақылауға алғанын хабарлады. Комитет төрағасының тапсырмасымен психологтар мен өңірлік балалар құқығы жөніндегі уәкіл оқушы мен отбасына көмек көрсетуге барды.
«Бұл істі жан-жақты зерттеу жүріп жатыр. Сонымен қатар Туризм және спорт министрлігіне және СҚО әкімдігіне хат жолданды. Балалардың құқығы мен қауіпсіздігі – мемлекет үшін басым бағыт. Бұған дейін де спорт мектептерінде қауіпсіздікке қатысты бірқатар заңбұзушылық анықталған», – деп мәлімдеді ведомство.
Комитеттің дерегінше, биыл жаңа оқу жылынан бастап «ДосболLIKE» атты антибуллинг бағдарламасы енгізілген. Жоба спорт мектептері мен басқа да білім беру ұйымдарында қауіпсіз әрі құрметті орта қалыптастыруды көздейді.