RUS
SMARTNEWS.KZ басылымының хабарлауынша, Шымкентте Матибұлақтағы әскери бөлімде көз жұмған сарбаз Дінмұхаммед Шынарбекпен қоштасу рәсімі өтті.
Жерлеуге туыстары мен жақындары, сондай-ақ Қорғаныс министрлігінің өкілдері қатысты.
Дінмұхаммед әскер қатарына небәрі бес ай бұрын шақырылған. Алайда оның өліміне қатысты ресми нұсқаға туыстары күмән келтіріп отыр. Әскерилердің айтуынша, сарбаз өзіне қол салған болуы мүмкін. Бірақ отбасы бұған сенбейді.
«Денесін тапқан кезде қолы арт жағынан байланып тұрған. Оны өлтірген. Бұған әскери бөлімнің салғырттығы себеп. Дұрыс бақылау болмаған», – дейді марқұмның жақындары.
Туыстарының айтуынша, Дінмұхаммед өмірді сүйетін, алға қойған арманы бар жігіт болған. Ол колледжде аспаздықты оқып, кондитер болып жұмыс істеген. Болашақта жеке кондитерлік кәсібін ашуды мақсат тұтқан.
Марқұм отбасындағы ең кенже бала еді. Артында егіз сыңары, сондай-ақ ағасы мен әпкесі қалды.