«Мәңгүрттер, арсыздар»: Оралда экс-кандидат сайлаудағы бақылаушыларды қорлағаны үшін сотқа тартылды
Оралда Жұмабек Жапбарқұловтың ісі қаралды.
SMARTNEWS.KZ басылымының хабарлауынша, экс-кандидат Жұмабек Жапбарқұлов шілдеде Қазталов округінің әкіміне өткен сайлаудан кейін бақылаушыларға қатысты жазған пікірінен соң сотқа берілген.
Сайлау кезінде «Жария» қоғамдық бірлестігінің бақылаушылары заңбұзушылықтар анықтаған: жалған қолдар мен өтініштер арқылы қашықтан дауыс беру ұйымдастырылған. Осыдан кейін учаскелік комиссия мүшелерінің жаппай жұмыстан босатылғаны белгілі болды.
Жағдайға наразы болған Жапбарқұлов Facebook желісінде бақылаушыларды қатты сынға алды:
«Мұндай мәңгүрттер, арсыздар әділет іздеп жүргенсіп, халықты тәуелсіздіктен айырады. «Жария» деген атпен құлдыққа жетелейді», – деп жазды ол.
Бұл сөздерді «Жария» жетекшісі өзіне және ұйымдағы бақылаушыларға тіл тигізу деп бағалап, сотқа арызданған.
Алайда сот тағайындаған психологиялық-филологиялық сараптама Жапбарқұловтың пікірінде қорлау немесе жала жоқ екенін көрсетті. Нәтижесінде іс құқықбұзушылық құрамының болмауына байланысты тоқтатылды.
Материал авторы
