«Қызымның еміне ақша жинауы үшін 750 мың бердім»: Ілияс Сәриевтің соты басталды

SMARTNEWS.KZ басылымының хабарлауынша, Алматыда Алмалы аудандық сотында блогер Ілияс Сариев пен оның серіктесі Ақтоты Дүйсееваға қатысты сот процесі басталды.

Істе барлығы 26 жәбірленуші бар. Олардың басым бөлігі — мүмкіндігі шектеулі балалары бар ата-аналар.

Сотта куәлік еткен Айман есімді жалғызбасты ана Ілиястың сеніміне кіріп, 750 мың теңгеден айырылғанын айтты:

«Қызымның еміне ақша жинауға көмектесемін деді. Алдымен 100 мың теңге сұрап, видео түсіретін адамдарға төлеймін деді. Кейін тағы- тағы ақша сұрап отырды. Барлығы 750 мың теңгедей жібердім. Бірақ уәде еткен қаражат жиналмады. 29 наурызда-ақ бізді алдағанын түсіндік», — деді ол.

Онлайн қосылған өзге аналар да блогердің «ақша жинап беремін» деген сөзіне сеніп қалғандарын жасырмады. Бір жәбірленуші:

«Егер Ілияс ақшаны қайтарса, кешірім беремін. Қасында жүрген Дүйсееваға қатысым жоқ», — деді.

Ал Сариевтің адвокаты Эльнура Кішкенебаева істі «ақша жинау мерзімдері нақты көрсетілмеген келісім» деп сипаттады:

«Ілиястың тарапынан зақым келтіретін әрекет болмаған. Барлық видеоларын жариялады, тек бір айға кешіктірді», — деді ол.

Келесі сот отырысы 25 қыркүйекте жалғасады.