RUS
SMARTNEWS.KZ басылымының хабарлауынша, Алматыда УЕФА Чемпиондар лигасының топтық кезеңіндегі ең күтілген ойындардың бірі өтеді. 30 қыркүйек күні Орталық стадионда қазақстандық «Қайрат» испандық алпауыт «Реал Мадридке» қарсы алаңға шығады.
Ұйымдастырушылардың мәліметінше, матчқа билеттер сатылымы бүгін, 23 қыркүйекте сағат 17:00-де басталады. Бағасы 30 мыңнан 250 мың теңгеге дейін белгіленген. Секторлар бойынша құны мынадай:
Батыс трибуна (1–9 сектор, 1–2 қатар) – 30 мың теңге;
Солтүстік және оңтүстік трибуналар – 75 мың теңге;
Шығыс трибуна – 150 мың теңге;
Батыс трибуна (орталық орындар) – 250 мың теңге.
Ережеге сәйкес, әр жанкүйер екі билеттен артық сатып ала алмайды. Тапсырыс кезінде және стадионға кіргенде жеке куәлік немесе төлқұжат деректері тексеріледі.
Билеттерді Ticketon платформасы, FCKAIRAT.COM ресми сайты және Qairat Superapp қосымшасы арқылы алуға болады.
Бұл кездесу қазақстандық футбол тарихындағы ең айшықты ойындардың бірі болуы мүмкін. Жанкүйерлер мұны нағыз футбол мерекесі деп атап отыр.