RUS
SMARTNEWS.KZ басылымының хабарлауынша, Батыс Қазақстан облысында бұрынғы шенеунікке тиесілі «Baystone» ЖШС-не қатысты қылмыстық іс қозғалды. Компания мемлекетке 1,8 млрд теңге қарыз болып қалған.
«Baystone» әлеуметтік маңызы бар көкөністерді тұрақтандыру қорына жеткізуге жүздеген миллион теңге, кейін көкөніс қоймасын салуға тағы бір миллиард алған. Бірақ не картоп келмеді, не жаңа қойма салынбады. «Ақжайық» дерегінше, бөлінген қаржыны компания иелері заңсыз шығарған.
Орал соты «Baystone»-нан 1,8 млрд теңге өндіріп алуды ұйғарды. Компанияның есепшоттары мен мүлкіне тыйым салынды.
Сонымен қатар, әлеуметтік бағаға алынған картоптың бір бөлігі Ресейге шығарылып, қымбатырақ сатылған болуы мүмкін деген күдік бар.
Компанияны бастапқыда кәсіпкер, бұрынғы мәслихат депутаты және «Батыс» басшысы Сергазы Ісембаев құрған. 2025 жылғы ақпанда ол фирманы бизнесмен Станислав Качалоға сатқан. Качало 2000-жылдары БҚО әкімінің орынбасары болған. Қазір дәл осы Качало миллиардтаған берешекпен қалған компанияның жалғыз иесі ретінде тіркелген.